Make your own free website on Tripod.com
Arangkada ni Leo Lastimosa
Tuesday, 18 April 2006
Arangkada for April 19, 2006
* *

* ID NI JOJO*

* *

Pila ka adlaw sa wa pa siya patya, si Jojo de la Victoria nakadawat
sa iyang bag-ong ID human na-renew ang iyang accreditation sa Kapisanan ng
mga Brodkaster ng Pilipinas (KBP). Ambot nagpasiaw ba lang ngadto sa iyang
kaubanan sa DYRF Radio Familia o nakalili na sa iyang umaabot, si Jojo
nakatuAW: "Akong letrato mora kong naa sud sa lungon."

Natandog kaayo ning maong sugilanon si Edward Abad, chairman sa KBP
Cebu Chapter. May mga magsisibya man god nga gipamatay sa nangaging mga
buwan nga wa kapahimus sa hingpit nga mga benepisyo kay nihupas nang ilang
pagkasakop sa KBP. Isip mga tagtungod sa accredited nga magsisibya,
ang asawa ug anak ni Jojo makadawat sa P25,000 nga financial assistance ug
P10,000 nga burial assistance. Wa ni labot sa P3,000 nga dugang hinabang
gikan sa Cebu chapter.

-o0o-

Wa pa gani malubong ang patayng lawas ni Jojo, ang commercial
fishing operators nagpaugat dayon pagsud sa Visayan marine triangle duol sa
isla sa Bantayan. Matod ni Atty. Antonio Oposa, pangu sa Visayan Sea
Squadron, wa gyod piski bisan gamay na lang lama sa kaikog ang dagkong mga
negosyante nga namugos sa makadaot nga paagi sa ilang pangisda sa mabaw nga
kadagatan sa Kabisay-an.

Human nadawat ang text messages gikan sa mga sakop sa squadron nga
nagbase sa Bantayan, nagpalaban dayon si Oposa ni Gobernador Gwen
Garcia. Kinsa
niawhag sab dayon sa Philippine Navy pagbadlong sa dagkong mga
panagatan. Hinaot
nga ang kawsa pagpanalipod sa katigayonan sa kadagatan magpadayon bisan kon
matabonan na sa mas bag-ong mga kontrobersiya ang bayanihong kamatayon ni
Jojo.

-o0o-

Si Jojo di maoy labing gamhanang opisyal sa kampanya batok sa ilegal
nga pangisda. Ang iyang gahom kutob ra mga utlanan sa Dakbayan sa Sugbo.
Usa man gani sa mga tinubdan sa iyang kahimangod mao ang wa pagtabang sa
ubang mga dakbayan ug kalungsoran sa Sugbo.

Apan ang iyang hugot nga pagbantay sa kamerkadohan sa dakbayan gikan
sa pinabuthang mga isda nakapiang sa higanteng ilegal nga mga panagatan. Way
kapuslanan ang ilang pagsuburno sa ubang lokal nga mga opisyal kay
gitak-opan mang Jojo ang labing dakong merkado sa ilang kuha.

-o0o-

Ang kakuwang ni Jojo og gahom pagbaraw sa tanang matang sa ilegal
nga pangisda sa tibuok Sugbo ug kasilinganang mga lalawigan wa makapaluya
niya, hinunoa hingpit niyang gitapakan pinaagi sa pagbuyag sa ubang buhatan
sa kagamhanan nga napakyas pagtuman sa ilang katungdanan.

Ug, ginamit ang iyang abundang kasayuran sa kaliboan ug usa ka mga
palusot, way gipasaylo ang maisugon niyang pagbisto ngadto sa katawhan sa
pipila ka polis, sundawo, piskal, huwes, opisyal sa nasudnong mga ahensiya,
negosyante ug bisan mayor ug gamhanang mga politiko nga iyang nasakpang
nagpabaya o nakigkonsabo gyod sa mga bangis nga nanamastamas sa
kadagatan. [30]
leo_lastimosa@abs-cbn.com


remote Gipada ni: nagpakabana at 6:33 PM JST
Saturday, 25 March 2006
Arangkada for March 26, 2006
*MGA BOLUNTARYO*



Karong Martes, Marso 28, ang ika-40 ka adlaw human sa katalagman
sa Guinsaugon, St. Bernard, Southern Leyte. Sama sa naandan, ug kamatuoran
nga mas gamhanan ang tradisyon kay sa bangis nga katalagman, ang santos nga
misa nga saulugon sa Simbahang Katoliko sundan sa dakong kumbira nga giandam
sa munisipyo.

Nianang adlawa, ang DYAB Abante Bisaya ug ABS-CBN Cebu mohatod
pinaagi sa Sky Patrol sa mga tinun-an sa Guinsaugon nga nigradwar karong
buwana sa ilang mga kurso sa mga eskuylahan dinhi sa Sugbo ngadto sa lapad
nga dahili sa yuta nga gituohang nalubngan sa ilang mga ginikanan ug ubang
mga sakop sa pamilya.

Mao ni among tubag sa hangyo sa mga tinun-an nga makahalad sa
nangamatay nilang mga kapamilya ang malampusong pagtapos sa ilang mga kurso
bisan sa lisod nga pagsuway nga ilang nahiagoman.

-o0o-

Ang tanang 16 ka mga tinun-an sa Guinsaugon nga nia mag-eskuyla sa
Sugbo gipasidunggan sa Junior Chamber International (JCI) Central Visayas ug
ubang mga tigpasiugda sa ilang scholarship fund niadtong Biyernes. Gihalaran
silag Santos nga Misa sa Redemptorist Church pagka hapon, dayon gibangkahan
og panihapon sa Big Gerry's nga gipanag-iya ni Cebu City Councilor Gerardo
Carillo, nga hingpit sang nipaluyo sa nagpadayong kampanya pagtigom og pondo
nga igong makapatiwas sa ilang pag-eskuyla sa mosunod nga upat ngadto sa
lima ka tuig.

Ang mga representante sa JCI, Cebu City Government ug Kapisanan ng
mga Brodkaster ng Pilipinas (KBP) isig angkonay sab sa niaging semana og mga
gradwado nga ilang giubanan pagpaso pagdawat sa ilang mga diploma sa
University of the Visayas (UV) ug University of Cebu (UC). Ang kataposang
gradwado mopaso karong Lunes, Marso 27.

-o0o-

Tuguting akong pasalamatan dinhi ang mga boluntaryo sa labing
dakong paghipos sa mga hinabang gikan sa mga Sugboanon alang sa mga biktima
sa katalagman sa Southern Leyte. Ang Kapamilya Relief Campaign sa DYAB
Abante Bisaya ug ABS-CBN Cebu nakakolekta sa gibanabanang P20 milyones nga
balor sa sinakong bugas, linatang sardines, pinutos nga noodles ug mga gamit
sa bay.

Ang mas lisod nga gimbuhaton pag-repack sa relief goods ug
paghatod nila ngadto sa mga biktima natuman tungod sa hingpit nga pag-unong
sa mga boluntaryo nga way kutat sa pag-amot sa ilang kahago ug panahon,
adlaw ug gabii, sa ABS-CBN Regional Broadcast Complex nga sa niaging pila na
ka semana nahimong higanteng relief operations center.

Sa pagda sa upat ka hugna sa relief goods ngadto sa Southern
Leyteang mga boluntaryo way kakapoy nga nikarga-diskarga ug nibantay
sa mga
hinabang sa mga Sugbuanon. Salamat sa mga boluntaryong Sugbuanon, labi nang
Barangay Kapitan Joel Garganera nga lumad nga taga St. Bernard, natuman sa
ABS-CBN ang tahas nga gisangon sa mga Sugbuanon pagpabaha sa ilang
kamanggihatagon ngadto sa makaluluoyng mga biktima sa katalagman. [30]
leo_lastimosa@abs-cbn.com


remote Gipada ni: nagpakabana at 5:37 PM WST
Friday, 17 March 2006
Arangkada for March 18, 2006
*TABANG GIPALAPDAN*



Ug napirmahan na gyong kauyonan sa nagkalainlaing mga institusyon
nga nagtinabangay aron makatiwas ang mga tinun-an sa Guinsaugon, St.
Bernard, Southern Leyte sa ilang mga kurso sa mga kolehiyo ug unibersidad
dinhi sa Sugbo. Ang pinirmahay sa memorandum of agreement atol sa Kapamilya
Media Forum gisundan sa pormal nga pagtunol sa pasiunang pondo nga nahipos
ngadto sa Ramon Aboitiz Foundation Inc. (Rafi), ang mamahimong tagduma sa
scholarship program.

Ang nadawat sa Rafi nga P600,000 nga natigom sa "Radiothon" sa
Kapisanan ng mga Brodkaster ng Pilipinas (KBP) Cebu Chapter, Cebu City
government ug Junior Chamber International (JCI) Central Visayas ug P180,000
gikan sa mga tigpaminaw sa DYAB Abante Bisaya dako pa kaayog kuwang pagtubag
sa batakang galastohan sa mga tinun-an sa mosunod nga upat ngadto sa lima ka
tuig, nga gibanabanang kapin sa P2 milyones.

-o0o-

Sa ato pa, ang pinirmahay sa MOA gahapon di maoy kataposan, hinunoa
sinugdanan pa lang sa mas lapad nga kampanya nga ning higayona itutok na
gyod di lang sa mga panginahanglan sa 16 ka mga tinun-an sa kolehiyo kon
dili apil na sa mga tinun-an sa high school sa St. Bernard nga nawad-an sab
sa ilang mga ginikanan ug ubang sakop sa pamilya tungod sa katalagman sa
Guinsaugon.

Si Barangay Kapitan Joel Garganera bag-o lang nahibalik gikan
sa St.Bernard nga nagda na sa pasiunang listahan sa mga tinun-an nga
mogradwar na
sa high school karong buwana. Si Executive Director Dominica Chua sa Rafi
nidasig sa mga tigpasiugda pagbukas sa scholarship fund ngadto sa tabanganan
usab nga mga tinun-an sa high school, bisan kon adto sa motiwas sa mga
tulunghaan sa Leyte.

Bisan ang mga 16 ka mga tinun-an nga nitambong sa Kapamilya Media
Forum sa SM City Entertainment Plaza nipadayag og panghinaot nga tabangan
sab sa mga Sugbuanon ang mga tinun-an nga nagsunod nila.

-o0o-

Salamat na lang nga ang mga Sugbuanon bisan usa na ka buwan human sa
katalagman nagpadayong init pagtampo alang sa mas sanag nga kaugmaon sa mga
tinun-an sa Guinsaugon. Ang manggihatagong mga indibiduwal ug mga kompaniya
padayong nanghatod sa ilang mga donasyon sa DYAB Abante Bisaya. Ang SM
Foundation nakiglambigit na sa Rafi, samtang ang Bigfoot nisaad paghatag og
P248,000 ngadto sa Rafi sunod semana.

Ang KBP, JCI ug ABS-CBN Broadcasting Corporation nagkasabot paglusad
og kampanya paglibot sa mga kompaniya ug civic organizations sa Sugbo
pagdasig sa management ug mga kawani pagtampo sa scholarship fund. Giawhag
ang Globe sa pagbanhaw sa pagbukas sa ilang sistema aron nga ang mga
Sugbuanon mas sayon nga makaamot pinaagi sa text. Ang Philam Savings Bank
sa Osmena Blvd. padayon sang nanawat og mga donasyon pinaagi sa tinuyo nga
Southern Leyte account number 2102949416. [30] leo_lastimosa@abs-cbn.com


remote Gipada ni: nagpakabana at 5:10 PM WST
Friday, 10 March 2006
Arangkada for March 11, 2006
*SULAD SA YUTA*


Ang atong mga piniriso apil sa labing alaot nga mga linalang ning walog sa
mga luhaan sa atong bag-ong panahON: Naghuot na pag-ayo sa mga prisohan nga
magbarug na lang sila nga mangatug, kanunayng gipanggutom kay kuwang ang
pagkaon, kinahanglang mosuburno sa jail guards ug wardens aron di hilabtan
sa ubang mga piniriso, ug maglaway nga magtan-aw sa kuwartahan nga mga
piniriso nga mabuhong sa bino, ilegal nga drugas ug mga babayeng mugbo og
lupad.

Ang babayeng mga piniriso mas alaot pa gyod. Gipangulogos sila sa mga
tagduma ug sa ubang piniriso kay kasagaran nila, sama sa mga batang
binilanggo, wa ibuwag og selda gikan sa labing bangis nga mga kriminal. Ang
mga giabusohan—bata, babaye o lalaki man—di katiyabaw tungod sa kahadlok nga
tiwasan.

-o0o-

Nahadlok kong nakadungog na mo ining mga linyaha. Kay susama gyod sa akong
mga gahot dinhi ug sa radyo mahitungod sa BBRC ug ubang mga prisohan sa
nasud. Kabahin ni sa 2005 Human Rights Report sa US State Department nga
gipagawas gahapon.

Gibungulbungolan lang sa gobyerno ang nahaunang sibaw nga mga awhag gikan sa
nagkalainlaing sektor sa pagpalambo sa mga prisohan sa tibuok nasud. Ang
BJMP, bisan sa ulog-ulog nga 16% nga uminto sa budget, nagpabiling inutil sa
(1) pagtukod og mas dagkong mga prisohan, (2) pagdisiplina sa abusado ug
kurakot niyang mga sakop ug (3) bisan sa pagpakaon og tarung sa iyang mga
piniriso.

Hinaot nga karong nabantayan na ning maong eskandalo sa US, nga morag mao
ray gikahadlokan ning administrasyona--kahinumdom mo nga morang gisilihan si
Pres. Arroyo nga nidalidali paglibkas sa iyang state of national emergency
human siya pakigkitai sa dakong opisyal sa state department—mapugwat nang
gobyerno sa kamatuoran nga, ambot tungod ba lang sa pagpabaya o tinuyo gyod,
gihimo nila ang atong mga prisohan nga tinuod nga mga impiyerno sa yuta.

-o0o-

Pipila sa mga punto sa report sa state departmeNT:

-

Nisamot kahuot ang mga prisohan sa 2005 kay ang mga piniriso niabot
nag 390% sa kapasidad sa mga prisohan kon itandi sa 323% sa 2004;
-

Ang kaluya sa husay sa mga kaso nakatampo sa grabeng kahuot;
-

P40 ray gigahin sa BJMP alang sa inadlawng pagkaon sa mga piniriso, sa
ato pa, P13 ra kada kaon;
-

Gitugotan sa mga prisohan ang mga paryente pagsud-gawas sa mga selda
aron makatabang pagpakaon sa mga piniriso;
-

Lapad ang pangurakot sa mga guwardiya nga nangilkil og kuwarta sa mga
piniriso aron makadawat og dugang pagkaon, makagamit sa mga pansayan ug
makalikay sa pangulata sa ubang mga piniriso; ug
-

232 lang sa 1,132 ka mga prisohan nga giduma sa BJMP ug PNP ang dunay
buwag nga mga selda alang sa kabataan, samtang 435 lang ang dunay buwag nga
selda alang sa kababayen-an. [30] leo_lastimosa@abs-cbn.com


remote Gipada ni: nagpakabana at 6:46 PM WST
Thursday, 9 March 2006
Arangkada for March 10, 2006
*KRISIS SA ABC*


Sa sinugdanan, usa ra ka opisyal sa board of directors sa Association of
Barangay Councils (ABC) Cebu City Federation ang uyon nga bayran sa iyang
mga benepisyo ang kanhi project engineer sa ABC nga si Leah Rondez. Ang
mayoriya sa mga sakop sa board nibasura sa demanda ni Rondez human siya
taktaka sa pag-asumir sa bag-ong liderato sa ABC niadtong 2002.

Dihang gikiha ni Rondez silang ABC President Eugenio Faelnar ug kaubanan
atubangan sa Visayas Ombudsman, napun-an ang mga sakop sa board nga niawhag
ni Faelnar nga bayran na lang si Rondez. Nadugangan pa gyod ang mga opisyal
sa ABC nga nibali dihang nagkaklaro na nga mapasaka nang kaso sa
Sandiganbayan nga segurong mosangpot sa ilang pagkasuspenso sa katungdanan.

-o0o-

Human nimando ang Sandiganbayan pagsuspenso nilang Faelnar ug kaubanan,
nisamot ang tensiyon tali sa mga sakop sa ABC board. Usa sa mga opisyal
nihunong na pagtambong sa mga tigom human niya tulisoka si Faelnar nga maoy
responsible sa ilang bulilyaso.

Ubang mga opisyal sa ABC kumbinsido na nga naduhig lang sila sa
pagpa-itoy-itoy ni Faelnar kang Cebu City Mayor Tomas Osmena. Kinsa maoy
ilang gidudahan nga maoy nagdiktar ni Faelnar nga pagbayad ni Rondez sa
iyang mga benepisyo. Tungod lang kay kumbinsido ang mayor nga si Rondez tawo
nilang kanhi mayor Alvin Garcia ug kanhi ABC president Jose Navarro ug busa
angayng silotan human napilde ang iyang mga amo.

Karong nasuspenso na sila, gisudyaan nila si Faelnar nganong wa kadupa si
Osmena nila.

-o0o-

Laing opisyal sa ABC may laing reklamo batok ni Faelnar. Nipasangil siya nga
gilaktawan ang mga sakop sa board sa mahinungdanong mga transaksiyon nga
gisudlan sa ABC. Nagduda gani siya nga ang tinuod nga nagduma sa ABC di na
si Faelnar, kinsa gihulagway nga mas nalinga sa iyang mga bisyo ug ubang
laag, kon dili ang usa sa mga tinudlo ni Faelnar.

Sa usa ka tigom nga gitambongan sa pipila ka sakop sa ABC board, gikatahong
diriyot matuok sa masuk-anong opisyal ang pinalabi ni Faelnar. Ug inay
atubangon ang krisis sa iyang liderato, si Faelnar igo lang nagpahibawo usa
ka adlaw dayong patuman sa tulo ka buwan nilang suspenso nga mobakasyon
siya.

-o0o-

Maong hingpit nga nahugno ang mga opisyal sa ABC. Gawas nga wa matinuod ang
pasalig sa ilang mga abogado nga mabasura ang mga kaso ni Rondez batok nila,
wa sab matuman ang laing pasalig nga igo lang silang masuspenso sa ABC board
ug makapadayon sa ilang mga gimbuhaton pagka kapitan sa ilang mga barangay.

Gawas ini, duna pa gyoy laing kaso nga gipasaka nilang Rondez ug kaubanan
tungod sa kapakyas sa board paghatag sa ilang termination benefits. Di pa na
igo, ang nipuli ni Faelnar pagduma sa Guadalupe mao ang numero unong
konsehal nga iyang giapiki kay dugay nang giisip nga hulga sa iyang
liderato. [30] leo_lastimosa@abs-cbn.com


remote Gipada ni: nagpakabana at 5:10 PM WST
Tuesday, 7 March 2006
Arangkada for March 8, 2006
*LALIS SA WALI*


Si Carmen Campbell, nga nasentro sa banner story sa The Freeman tungod sa
iyang pagbarug batok sa pari ug pag-walkout gikan sa misa sa St, Joseph
Parish sa Mabolo, Cebu City, nipasabot nga iyang gibadlong si Padre Antonio
Mansueto, kansang wali niadtong Marso 3 nanaway pag-ayo sa administrasyon ni
Pres. Arroyo, kAY:

-

Ang simbahan mao ang pinuy-anan sa Ginoo;
-

Nangadto sila didto aron mangaliya; ug
-

Way katungod ang pari pagpanaway sa gobyerno.

Duna koy gamayng pangutana ngadtong CampbeLL: Kon gidayeg pa sa pari ang
presidente, mangisog pa kaha gihapon siya?

-o0o-

Kon kinasingkasing ang pagkalawat ni Campbell sa mga pagtulun-an sa
Simbahang Katoliko, nahibawo siya nga dakong bakak ang iyang pangugat nga
way katungod ang mga pari pagpanaway sa gobyerno. Kay gawas sa pagluhod ug
ubang ritwal sa misa, obligasyon sa kaparian ang pagpatigbabaw sa gisugdan
ni Hesukristo sa iyang panahon nga pakigbisog batok sa inhustisya ug
panaugdaog.

Kon gibuka ni Campbell ang iyang mga mata sa mga panghitabo sa nasud,
nahibawo siya nga nagpadayon ang inhustisya ug panaugdaog nga maoy hinungdan
sa higanteng krisis sa nasud karon. Ug ambot kon tungod sa iyang dakong
gugma ni Pres. Arroyo makapangahas ba siya pagtulisok sa mga pari ug mga
kaatbang sa administrasyon nga maoy nangawat, nanikas ug nagbudhi sa
kinabag-an sa katawhan.

-o0o-

Kinsay makahukom kon ang panaway ni Padre Mansueto gipasikad pa ba sa iyang
matinud-anong paghubad sa Balaanong Kasulatan o nasagolan na sa iyang
personal nga kasuko ug pagdumot? Kinsay makasuhid unsay naa sa sud sa iyang
kasingkasing ug hunahuna? Way tawo nga makahimo ana. Bisan si Campbell ug
ubang dumadapig sa presidente.

Maong si Arsobispo Ricardo Kardinal Vidal kutob lang sa pagiya apan di
makabuot unsay isulti sa iyang mga pari. Samtang silang Mansueto ug Msgr.
Achilles Dakay wa nay bilib sa presidente, silang Msgr. Esteban Binghay ug
ubang kaparian maayo sang molampaso sa mga kaatbang sa presidente.

Angayng pahinumdoman si Campbell nga usa sa mahinungdanong mithi sa
demokrasya mao ang pag-ila sa katungod sa iyang isigka tawo, bisan pari,
pagpadayag og sukwahi nga baruganan.

-o0o-

Sa pikas nga bahin, kinsa man say makabasol ni Campbell kon tinuod gyod
siyang na-eskandalo sa wali ni Padre Mansueto? Kinsa man tuod tang magbuot
sa kinauyokan sa iyang kasingkasing siya nagtoo nga way luna sa simbahan ang
mga pagsaway batok sa iyang pinanggang presidente?

Apan nahibawo si Campbell nga misa, di lalis, ang iyang gitambongan. Ug kon
tinuod nga nakamugna og eskandalo ang nasobrahan rang wali sa pari, igo na
ba kadtong sukaranan sa pagmugna og mas dakong eskandalo pinaagi sa
paghunong sa misa, pagsiyagit atubangan sa balaanong altar ug sa manimbahay
ug pagtulisok sa pari? [30] leo_lastimosa@abs-cbn.com


remote Gipada ni: nagpakabana at 7:10 PM WST
Monday, 6 March 2006
Arangkada for March 7, 2006
*PASO NA SAB*


Human sa makuting pakisusi, nga naabtan og pila ka semana human nato ibisto
dinhi sa atong lindog ang makauuwawng anomaliya nga nalutsan ang Civil
Service Commission (CSC) sa inusab nga kopya sa Republic Act 6958, ang
charter sa Mactan Cebu International Airport Authority (MCIAA), napamatud-an
na gyod sa CSC nGA:

-

Ilegal ang paghupot ni Heneral Adelberto Yap sa katungdanan pagka
general manager sa MCIAA;
-

Way katungod si Yap pagpabilin sa katungdanan lapas sa Pebrero 21
karong tuiga ni sa pagkobra sa bisan unsang suholan ug benepisyo gikan sa
MCIAA; ug
-

Kon mamugos ang MCIAA Board pagpalingkod ni Yap, silang Gobernador
Gwen Garcia ug ubang mga sakop maduhig sa ilegal nga buhat ni Yap ug maoy
pabayron sa bisan unsang pondo nga mabayad ngadtong Yap.

-o0o-

Sa laktod ug way lipudlipod nga pagkasulti, kolorum si Yap. Ang iyang
pangugat nga siyay angayng molingkod bisan kon way qualification nga
gihuptan sa karibal niyang mga aplikante, kay siya ray dunay nominasyon
gikan ni Pres. Arroyo, nga iyang gipatoong maoy gimbut-an sa RA 6958,
nasakpan nga dakong bakak. Ang kuwestiyonableng probisyon nga maoy gidigahan
ni Yap sa tanan niyang baraha igo ra diayng gipasukip ug di gyod kabahin sa
balaod.

Gani, ang pagkatangtang sa katungdanan di maoy kataposan sa kalbaryo ni Yap.
Nagpadayon na karon ang imbestigasyon sa CSC kinsay nag-ilad nila. Aron
pagmatuod sa ilang pangisog nga di na tugotang mailad pa sa umaabot,
pasakaan gyod og kasong "falsification of public documents" ang nagbuotbuot
pag-usab sa kopya sa balaod nga gisumiter ngadto sa CSC ni Transportation
Secretary Leandro Mendoza, kinsa kon di kakonsabo sa nangalisbong lipatlipat
gitoohan nga igo lang gilawogan ni Yap sa mini nga balaod.

-o0o-

Ang pag-uyon sa tanang sakop MCIAA board, way bisan usang nisupak, sa
paglugway sa appointment ni Yap wa pa masumiter ngadto sa CSC, nga ubos sa
balaod kinahanglang ilang himoon sud sa 30 ka adlaw. Kon isumiter na,
ibasura kini sa CSC ug pahibaw-on ang board nga kalapasan sa balaod ang
ilang pagsabak-sabak ni Yap ug nga kinahanglan silang mamili sa ubang
qualified nga mga aplikante.

Sa ato pa, masikwate na sang MCIAA board. Ambot nganong wa pa gyod motagam
human napaso sa samang eskandalo sa ilang pagdupadupa ni kanhi MCIAA general
manager Angel Verdan kaniadto. Lisod sabton nganong sa makausa pa nagpabaga
na sab pagyatak sa charter sa MCIAA.

Gusto ba lang gyod silang mosipsip ni Pres. Arroyo nga maoy nagpirma sa
nominasyon ni Yap? O tinuod ang pasangil nga kabahin na sa higanteng konsabo
pagpalusot sa multi-milyones pesos nga proyekto sa MCIAA nga mahimong
lakturon lang pagpatuman ginamit ang umaabot nga ASEAN Summit isip
salimbong? [30] leo_lastimosa@abs-cbn.com


remote Gipada ni: nagpakabana at 5:37 PM WST
Sunday, 5 March 2006
Arangkada for March 6, 2006
* *

* MARCOS GIBANHAW?*

* *

Ang mga tawong nag-awhag nilang kanhi presidente Corazon Aquino ug
kaubanan sa paghunong sa ilang mga protesta ug pagtugot na lang ni Pres.
Arroyo pagtiwas sa iyang termino hangtod sa 2010 mahimong nagtinguha sa
kaayuhan sa nasud, bisan may sukaranan ang mga pagduda nga mga turutot ra
sab sa administrasyon ang nagsige og batil ning linyaha, apan ang awhag
mosangpot sa pagkabanhaw sa ngitngit nga katuigan sa diktadura ni kanhi
presidente Ferdinand Marcos.

Sud sa kapin sa usa ka dekada nga way gihimo ang katawhang
Pilipinhon bisan abundang mga tilimad-on nga ang pagdekarar sa martial law
sa 1972 wa itumong sa kaayuhan sa kinabag-an kon dili aron lang pagpaburot
sa mga hinanib sa diktadura. Ang kinabag-an sa katawhan niadtong higayona
nagpakaaron ingnon nga normal ang ilang kinabuhi ug gipasagdan si Marcos
pagduma sa nasud bisan sa labing di makiangayong mga paagi.

-o0o-

Dihang gikandadohan ni Marcos ang Kongreso ug gihakop ang gahom
pagpanday og mga balaod, sama rang iyang gikawat ang mandato sa katawhan sa
way pagsumiter sa iyang kaugalingon sa usa ka ligdong nga piniliay—kay ubos
sa balaod, di na man sab siyang kadagan alang sa ikatulong sunodsunod nga
termino.

Dihang gitikas ni Pres. Arroyo ang eleksiyon sa 2004, sama rang
iyang gikawat ang mandato sa katawhan kay samtang nisumiter sa iyang
kaugalingon sa piliay iyang gilubag ang kabubut-on sa katawhan pinaagi sa
mapangahasong mga maniobra sa Mindanao nga klarong napamatud-an sa Hello
Garci tapes, maong hangtod karon wa pa gyod siyang kapangisog pagtubag,
kutob ra gyod sa lipatlipat.

-o0o-

Sa panahong Marcos, giilad ang katawhan nga igo lang niyang gisakmit
ang katigayonan sa mga adunahan aron iapod-apod ngadto sa kinabag-an. Kitang
tanan nahibawo nga ubos sa iyang pamunoan, ang Pilipinas gikan sa pagka
ikaduhang labing dato nga nasud sa Asya sunod sa Japan nahimong ikaduhang
labing kabos nga nasud sunod sa Bangladesh.

Ning panahong Arroyo, gipatoo ang katawhan nga di angayng tungluhon
ang pagpanikas kay ang tanang politico, apil nang mga lider sa oposisyon,
pulos tikasan. Bisan sa iyang kasalbahis, wa kahunahuna si Marcos ning
pabaga nga panagang dihang nasakpan ang iyang pagtikas sa snap election sa
1986.

-o0o-

Sa panahong Marcos, gihudlat ang katawhan nga kon palagputon si
Marcos sa Malakanyang, maalaot ang nasud kay way takos nga makapuli
niya. Mahimo
ganing lamyon ang Pilipinas sa mga rebeldeng komunista. Apan dihang
napalayas si Marcos, wa maalaot ang nasud, hinunoa gipasidunggan sa tibuok
kalibotan tungod sa pagkabanhaw sa demokratikanhong mga institusyon.

Ning panahong Arroyo, gipasidan-an sab ang katawhan nga way makapuli
niya ug nga kon taktakon mobanos ang nagkonsabong politikanhong oposisyon ug
mga rebeldeng sundawo ug mga komunista.

Naa ra nato kon magpailad pa ba ta pag-usab. [30]
leo_lastimosa@abs-cbn.com


remote Gipada ni: nagpakabana at 5:28 PM WST
Saturday, 4 March 2006
Arangkada for March 5, 2006
*LISOD NGA TAHAS*



Samtang nagkadaghan ang mga hinabang ug mga pasalig nga among
nadawat alang sa mga tinun-an sa Guinsaugon nga nia magtungha sa mga
kolehiyo ug mga unibersidad sa Sugbo ug samtang nagkadaghan ang mga detalye
sa kampanya paghatag nilag libreng edukasyon, pinuy-anan, pagkaon ug ubang
batakang panginahanglan sa mosunod nga upat ka tuig, nag-anam sab kalisod
ang among gimbuhaton.

Ang nagkalainlaing grupo nga among gikonsulta labot sa Sagop
Kapamilya campaign sa DYAB Abante Bisaya nipahiyos sa among kamasaligon sa
kasayon pagpatuman sa proyekto pinaagi sa pagbombardiyo sa mosunod nga
lehitimong mga pangutaNA:

- Nganong ang 15 ra man ka tinun-an nga nagtungha sa Sugbo ang among
tabangan nga dunay may mas daghan pang nailo ug mas nagkalisudlisod sa
Guinsaugon, St. Bernard ug ubang dapit nga naigo sab sa lapad nga pagdahili
sa yuta sa Southern Leyte?; ug
- Bisan pila pay kantidad nga among mahipos ug bisan unsa pa kahapsay
ang sistema nga among maumol, unsa may garantiya nga maatiman ang tanan
nilang panginahanglan ni nga matapos ang ilang mga kurso?

-o0o-

Apan bisan kon mahimut-okan mi usahay pagtubag sa mga pangutana,
ang labing dakong agipo nga padayong nagdasig namo pagpadayon mao ang laing
di malalis nga kamatuoran nga kinahanglang tabangan ang mga tinun-an. Tinuod,
lisod ang pagtabang nila, labi na ang pagpangandam daan sa umaabot nilang
mga panginahanglan sa mosunod nga upat ka tuig, apan mas imposible ang
paglingiw ug pagpangiyugpos laNG:

- Ang 15 ka taga Guinsaugon nga nagtungha sa Sugbo ang unang
gitabangan kay nia sila sa atong kaugalingong tugkaran, ang mga Sugbuanon
ang naa sa labing maayong posisyon pagtabang nila;
- Kon may igong kuwarta nga matigom ug kon may maumol nang sistema sa
malungtarung pagtabang nila, mahimong palapdan ang programa nga maglakip na
sa ubang mga tinun-an, apil nang taga Sugbo, nga dinalian sab ang
panginahanglan sa tabang pagtungha; ug
- Samtang way makaseguro sa mga panghitabo sa mosunod nga upat ka
tuig, apil nang pag-eskuyla sa mga tinun-an, kapangandamang daan ang labing
batakan nilang mga panginahanglan pagpalambo sa kahigayonan sa pagtiwas sa
ilang mga kurso.

-o0o-

Niang pipila sa mga sugyot nga among nahipos gikan sa
nagkalainlaing mga gruPO:

- Lisod ang pagsagop sa mga bata ug bisan ang pagpaipon na lang nila
sa nagpakabana nga mga pamilya kay bisan ang labing maayong
foster-parenthood screening di makatino nga magkasinabtanay ang mga bata ug
ang mga mosagop nila sa mosunod nga upat ka tuig;
- Mas maayong ipunon sila pagpuyo sa samang dormitoryo aron mas sayon
nga magkasaw-anay sa katalagman nga nahiagoman sa ilang mga pamilya; ug
- Mas maayong dasigon silang makabarug sa ilang mga tiil pinaagi sa
part-time nga mga trabaho aron nga ang kuwartang natigom kapahimuslan sa
mas daghang mga tinun-an nga susama nilag kahimtang. [30]
leo_lastimosa@abs-cbn.com


remote Gipada ni: nagpakabana at 5:19 PM WST
Friday, 3 March 2006
Arangkada for March 4, 2006
*

NAGBAGANG LALIS



Pagkahibawo nako nga silang Paul Rodriguez sa Bayan Muna ug Pastor Alcover
Jr. sa Anad manambong sa Kapamilya Media Forum sa DYAB Abante Bisaya ug Sky
Cable, nakumbinser ko nga di kasarangang diskusyon ang akong dumalahon.
Nalig-on ang akong pagtoo pagkakita nga puno nang mga lingkoranan sa
Entertainment Plaza sa SM City, nga maoy among tapokanan matag Biyernes sa
buntag.

Hapit magkadungan pag-abot silang Rodriguez ug Alcover, nga nagkabangga sud
na sa pila ka dekada tungod sa managlahing mga prinsipyo nga ilang
gibarugan, way kakiwaw nga naglamanohay dihang among gisungog. Apan ang
ilang paghangpanay wa kapugong sa pag-ulbo sa nag-alintabong pagbayloay og
mga pung pagsugod na sa media forum. Dihang nagkainitay na gyod, nihugyaw
ming tanan kay nibarug si Alcover ug gihatagan og botelya sa bugnaw kaayong
mineral water si Rodriguez ug ubang mga sakop sa panel.

-o0o-

Natinuod hinuon ang akong gikahadlokan. Ang pagtuki unta sa state of
national emergency nahimo nang lalis tali nilang Alcover ug Rodriguez, bisan
kon ang trademark nga singgaak ni Alcover gitubag lang gihapon sa bugnawng
tingog ni Rodriguez. Nagsugod ni dihang nipasangil si Alcover nga ang grupo
nilang Rodriguez maoy labing malipayon sa deklarasyon sa state of national
emergency kay nihaom sa tumong sa mga komunista pagmugna og rebolusyonaryong
sitwasyon. Nipasangil si Alcover nga ang managkaluhang pagpamomba sa Pasig
City pila ka gutlo sa wa pa libkasa ni Pres. Arroyo ang Proclamation 1017
binuhatan sa mga komunista aron mapugos ang presidente pagdeklarar sa
martial law.

Apan si Rodriguez nipasabot nga ilang kaubanan maoy labing unang nabunalan
sa bangis nga pagbungkag sa mga demonstrasyon sa Edsa ug Makati. Matod niya
di sab makiangayon ang pasangil ni Alcover nga silay namomba bisan wa pa
kasugdi ang imbestigasyon. Giawhag niya si Direktor Danny Sy sa NTC 7 nga
ang iresponsableng mga pamahayag ni Alcover maoy silotanm, di ang lehitimong
mga komentaryo sa media batok sa administrasyong Arroyo.

-o0o-

Ang mga nanambong, nga ang mayoriya mga sakop sa Guardians nga gipangulohan
ni kanhi customs collector David Odilao Jr., nitabang pagsugnib sa diskusyon
pinaagi sa pag-apiki ni Rodriguez sa ilang pangutana. Apan si Rodriguez
nagpabiling kalma, bisan sa pagpasabot nganong mga abuso ra sa militar ang
ilang gikondenar apan tak-om sila sa mga abuso sa NPA.

Gitapos ni Alcover ang lalis pinaagi sa paghagit sa iyang tapad nga si KBP
Cebu Chairman Edward pagpasiugda og debate tali niya ug ni Rodriguez. Ang
ubang sakop sa panel?•œsilang Koronel Jeffrey Omandam sa Centcom, Jeydar
Medrozo sa Kabataan Party, Roberto Go sa CCCI, Joselito Alo sa IBP Cebu,
Odilao ug Sy?•œdihang nakasal-ot sa nagbaga nga binayloay, nagkauyon nga ang
di-diay-personalay-nga-lalis nilang Alcover ug Rodriguez maoy timailhan nga
bisan ubos sa state of national emergency buhi pang demokrasya. [30]
leo_lastimosa@abs-cbn.com
*


remote Gipada ni: nagpakabana at 6:55 PM WST
Thursday, 2 March 2006
Arangkada for March 3, 2006
*SILANG MGA ILO*



Tulo sa 15 ka taga Guinsaugon, St. Bernard, Southern Leyte nga nia
mag-eskuyla sa mga kolehiyo ug mga unibersidad sa Sugbo mogradwar na karong
buwana. Tungod sa pagtabon sa usa ka bahin sa bukid sa Kan-abag sa ilang
barangay, mga panimay ug mga sakop sa pamilya, may kahigayonan nga ang ilang
pagpaso pagdawat sa mga diploma di malabwan sa pagbangotan sa nangamatay
nilang mga ginikanan ug mga igsoon. Apan ang kainit sa gugma ug pagpakabana
sa ilang Sugbuanong mga kapamilya maoy motino nga di sila magminga sa pormal
nga pagtapos sa ilang mga kurso.

Si Barangay Kapitan Joel Garganera sa Tinago maoy unang nisugyot
nga duyogan sa mga Sugbuanon ang nailo nga mga gradwado. Si Tata Cinco-Sy,
area manager sa ABS-CBN Central Visayas, kinsa sama ni Garganera may mga
kaliwat sa Southern Leyte, nidason sa panginahanglan paghimo sa gradwasyon
nga di lang halandumon kon dili makahuloganon sa pagpangandam pagsud sa
tinuod nga kalibotan sa ilang kaugalingong mga tiil.

-o0o-

Di kong katoo sa kadaghan sa mga pamilya nga nitubag sa among
pakitabang pagsagop sa mga tinun-an sa Guinsaugon. Nipasalig sila, nga
kasagaran nihangyo nga di ilhon sa publiko, nga gawas sa pagasto sa
matrikula, papuy-on nilang mga batan-on sa ilang mga panimay ug isipon nga
tinuod nga mga sakop sa ilang pamilya.

Ang kadaghan sa mga nibukas sa ilang mga kasingkasing, mga pitaka
ug mga panimay nakapatumaw sa bag-ong probleMA: Kon mas daghan ang mga
pamilyang mosagop kay sa nailo nga mga tinun-an, kinsa man nila ang hatagan
sa kahigayonan? Bisan tuod mas sayon kini kay sa orihinal nga problema sa
ka-way klaro sa pag-eskuyla ug kaugmaon sa mga biktima, angay gihapong
husayon sa labing daling panahon.

-o0o-

Ang Kapitolyo sa Sugbo nagtuon sa kahigayonan nga gamiton ang
kapin sa P200,000 nga nasobra sa P1 milyon nga donasyon sa Big Foot
International alang sa mga panginahanglan sa mga tinun-an. Ang KBP ug JCI
magtigom sab karong adlawa labot sa sugyot nga ang kapin sa P500,000 nga
nakolekta sa radiothon sa tanang estasyon sa radyo sa Sugbo igahin sab alang
sa mga tinun-an. Si Cebu City Councilor Gerardo Carillo nipahibawo nga
gitun-an sab sa konseho unsa ang mga panginahanglan sa mga tinun-an nga
ilang katabangan.

Si Garganera nangonsulta na sa Ramon Aboitiz Foundation Inc. sa
ilang lapad nga kasinatian pagduma og scholarships. Si Sy pormal nang
nisugyot ngadto sa ABS-CBN Foundation pagduma sa Sagop Kapamilya scholarship
program.

Wa magnihit ang mga hinabang alang sa mga tinun-an sa Guinsaugon.
Ang gikinahanglan na lang mao ang paghapsay ug pagpahimutang sa sistema nga
moseguro nga katabangan sila di lang karon nga lab-as pang katalagman kon
dili hangtod nga matiwas ang ilang pag-eskuyla ug mapahimutang nag mga
trabaho. [30] leo_lastimosa@abs-cbn.com


remote Gipada ni: nagpakabana at 7:10 PM WST
Wednesday, 1 March 2006
Arangkada for March 2, 2006
*SAGOP KAPAMILYA*


Ang labing dakong damgo ning among paghilas-hilas pagtabang sa mga tinun-an
sa napapapas nang barangay sa Guinsaugon sa St. Bernard, Southern Leyte mao
nga di lang kay abagahon ang tanan nilang bayranan sa eskuylahan ug ubang
panginahanglan hangtod nga makatiwas sa ilang mga kurso kon dili nga sagupon
gyod sila mga pamilyang Sugbuanon nga dunay igong luna sa ilang mga panimay,
panudlanan ug, labaw sa tanan, kasingkasing alang sa mga batan-on nga nailo
sa labing bangis nga katalagman nga nihasmas sa nasud karong tuiga.

Angayng pasidunggan ang University of the Visayas, ubang eskuylahan ug mga
kompaniya nga wa managana pagsaad pagtabang pagpa-eskuyla sa 15 ka taga
Guinsaugon nga nia magtungha sa Sugbo. Minilyon ka pesos ang ilang magasto
kay ang tabang di lang alang karon nga lab-as pang trahedya kon dili hangtod
pa sa umaabot nga katuigan, kanus-a mahimong makalimtan na sa kadaghanan ang
Guinsaugon.

-o0o-

Samtang lisod nang daan ang pagtigom og igong salapi nga makalahutay sa dako
nilang gasto sa matrikula, libro, pagkaon, plitehan, abangan sa boarding
houses ug ubang batakang panginahanglan, imposible nang mabanhaw ang
pag-amuma sa ilang mga ginikanan, mga igsoon ug kahigalaan nga nangalubong
sa nidahili nga yuta nga wa na igkita hangtod ning higayona. Apan bisan ang
gamay na lang bahin sa dakong haw-ang nga namugna sa katalagman mahimong
kahulipan sa mga Sugbuanong naa sa labing maayong posisyon pagtabang.

Sa usa ka bahin, ang nailo nga mga tinun-an, puno sa pagbangotan ug tugob sa
kahadlok pag-atubang nga mag-inusara sa way kasegurohang ugma. Sa pikas
bahin, may mga magtiayon nga way mga liwat, may mga panimay nga gihidlaw sa
kasaba, kakiat ug maya nga saad sa mas sanag nga ugma ug may mga
kasingkasing nga nag-alintabo sa naghitinghiting nga paghigugma ug
pagpangga.

Apan ang labing lisod nga tahAS: Unsaon man sila pag-abot?

-o0o-

Si Gloria Suma, 75, dalaga, US citizen, maoy labing unang nitanyag pagsagop
sa usa sa nailo nga mga tinun-an. Ang iyang gipangandoy babaye nga mao na
lay nahibilin sa tibuok pamilya. Wa siyang kahibawo makatuman ba sa tanang
panginahanglan sa balaod sa pagsagop. Ang iya rang ikapasalig mao nga
makahatag siya og tinuod nga pamilya ug pinuy-anan ug makagasto sa bisan
unsang kurso ug ubang panginahanglan sa tinun-an. Bisan sa kahadlok nga
kasarangang moduhig sa pagsalig sa tawong di suod ni kaila, di siya
magmalinawon nga magtan-aw lang sa mga tinun-an nga kinahanglang sagakayon.

Si Gloria wa mag-inusara. Daghan pang uban nga nakigsawo sa bulawanon niyang
kabubut-on. Maong mangahas mi pagtuktok sa inyong maaghop nga kasingkasing.

Nawa nang ilang karon, ihikaw pa ba natong ilang ugma? [30]
leo_lastimosa@abs-cbn.com


remote Gipada ni: nagpakabana at 6:45 PM WST
Tuesday, 28 February 2006
Arangkada for March 1, 2006
*GASA SA UGMA*


Tinuod ang sulti ni Senador Richard Gordon, gobernador sa Philippine
National Red Cross (PNRC): Ang angayng ibutang sa state of emergency mao ang
mga dapit sa Leyte nga hangtod karon nag-atubang sa hulga sa bangis nga
pagdahili sa yuta. Tuguting mangahas ko pagpuNO: Di ang Metro Manila nga
maoy lingkoranan sa gahom sa mga politiko nga di ganahan ug sa tanang
tilimad-on nahadlok nga manubag sa makiangayong mga pangutana giunsa pagdaog
ang eleksiyon sa 2004.

Human nitahan ang lokal ug langyawng rescuers sa kahigayonan nga duna pay
buhi sa mga biktima nga nalubong sa nahugno nga bahin sa bukid sa Kan-abag
nga nitabon sa tibuok Barangay Guinsaugon sa St. Bernard, Southern Leyte, ug
hinaot nga tungod lang ni sa pagsigeg uwan sukad niadtong Sabado, naluya
nang pagpangita sa mga biktima. May sukaranan ang kabalaka nga inanay nang
makalimtan sa kinabag-an ang dakong mga panginahanglan sa mga biktima sa
katalagman tungod lang sa nalab-as sa ilogay sa bukog sa kaulohan.

-o0o-

Salamat ni Barangay Kapitan Joel Garganera sa Tinago, nga taga St. Bernard.
Iyang gidasonan ang hagit sa among Area Manager sa ABS-CBN, Tata Cinco-Sy,
nga di lang mi kutob sa paghatod sa nagbaha nga hinabang sa mga Sugbuanon
ngadto sa mga bakwet. Ang iyang gisugyot nga scholarship sa mga tinun-an nga
nawad-an sa mga ginikanan tungod sa katalagman gipunit sa KBP Radiothon sa
niaging semana. Si Garganera, uban sa tabang ni Mayor Maria Lim sa St.
Bernard, maoy nihimo sa unang lakang pagsubay ug pag-ila sa mga tinun-an.

Nia sila magtungha sa mga kolehiyo ug mga unibersidad sa Sugbo, sa atong
kaugalingong tugkaran. Di na ta kinahanglang motabok ta og lawod pagtabang
nila. Kitay naa sa labing maayong posisyon sa pagluwas nila. Human nawagtang
di lang ang ilang barangay, bay, kabtangan ug pamilya, maglisod na sila
pagtiwas sa ilang mga kurso kon di nato sila agakon.

Nawa nang ilang karon, ato pa bang hikawan sa ilang ugma?

-o0o-

Sa 15 ka tinun-an, pito ang nagtungha sa University of the Visayas (ang
managsuong Jonmar, Joniel, Josie ug Eduard Esclavosa, Thelma Libaton, Alfred
Sibunga ug Elizabeth Celmar Ong), tulo sa University of Cebu (Myren Celmar,
Romeo Esguerra Jr. ug Jaycee Ylagan), duha sa Southwestern University (ang
managsoong John Alister ug Jo-Anne Cabug-os Letigio) ug tagsa sa Cebu
Doctor's University (Lorelie Yeth Binondo), University of San Carlos
(Jewelson Siona) ug Besavilla Engineering Review Center (Paul Esguerra).

Si UV Executive Vice President Jose "Dodong" Gullas pormal nga nilusad sa
kampanyang "Bunga sa Gugma" pagtigom sa mga hinabang di lang alang sa mga
tinun-an kon dili alang sa tanang biktima sa Guinsaugon.

Hinaot nga ang ubang eskuylahan mobukas sab sa ilang kasingkasing ngadto sa
nailo nilang mga tinun-an. [30] leo_lastimosa@abs-cbn.com


remote Gipada ni: nagpakabana at 7:36 PM WST
Monday, 27 February 2006
Arangkada for February 28, 2006
*GLO NAHUKASAN*


Ang wa mahimo sa politikanhong oposisyon, mga rebeldeng sundawo ug mga
rebeldeng komunista—nagkonsabo man sila o wa—gikan sa impeachment
proceedings, mga protesta sa kadalanan ug pagpasiugda og mga kudeta, gihimo
ni Pres. Arroyo sa usa lang ka pamilOK: Ang pagpahibawo sa tibuok nasud ug
sa tanang katawhan sa katandugon sa iyang pamunoan atubangan sa wa pa
gihapon matubag nga makiangayong mga pagduda sa kaligdong sa iyang kadaogan
niadtong 2004.

Salamat sa iyang deklarasyon sa "state of national emergency," gipamatud-an
ni Arroyo nga dako diayng bakak ang iyang pangangkon nga nahuman nang "Hello
Garci scandal" ug nga panahon nang talikdan sa nasud ug ang katawhan ang
nangaging pagkabuak-buak aron makairog na ngadto sa unahan. Pinaagi sa
Proklamasyon 1017, iyang giangkon nga magpabiling ginapos ang kagamhanan
hangtod nga mahusay sa paagi nga makatagbaw sa kadaghanan ang mga pangutana
sa iyang kahaom—o kakuwang ini—pagpadayon pagduma sa nasud.

-o0o-

Human niya gawongi ang kinabag-an sa mga kongresista aron nga mopaluyo sa
lapad nga maniobra paglugos sa impeachment proceedings—sa ingon, maluok ang
mga ebidensiya ug mga saksi sa nangalisbo nga tikas, gipikatan niyang mga
senador pinaagi sa pagpugong sa iyang mga tinudlo pag-atubang sa way
kinutoban nilang imbestigasyon sa labaw pang way kataposan niyang kahiwian.

Human niya nabahin-bahin ang huyang nang daan nga politikanhong oposisyon
pinaagi sa mga haylo ug paghukas sa kahilas sa mga nahilambigit sa
makalilisang sang pangurakot ug pangabuso sa diktadurang Marcos ug
eskandalusong administrasyong Erap, gihudlat pa gyod niyang katawhan sa di
pag-apil sa mga protesta sa kadalanan.

Apan inay mahilom ang mga pangutana, ang paglukapa sa malinawong mga paagi
pagsusi unsa gyoy tinuod nga nahitabo sa piliayng presidensiyal duha ka tuig
nang nilabay, nakapatental sa mga sundawo nga nawad-an nag tahud sa ilang
commander in chief sa paglihok.

-o0o-

Ang mga turutot sa Malakanyang nanganti nga pinaagi sa state of national
emergency mahukasan ang mga kaaway sa gobyerno, magukod ug kapahamtangan sa
kinatibuk-ang silot sa balaod. Apan ang tinurayng nahukasan mao ang ilang
aMO: Gipahiyos niyang puwersa sa politikanhong oposisyon ug mga rebeldeng
sundawo ug mga komunista—nagkonsabo man sila o wa—aron pagmatuod nga
kontrolado niyang sitwasyon aron lang paburuton paghanig sa iyang pagkumkom
sa di kasarangang mga gahom.

Ug kinsa pa man karoy motoo sa iyang pagpangugat nga siyay labing takos nga
manimon pagpalambo sa nasudnong ekonomiya nga napamatud-an na man sa makausa
pa—human sa iyang way kukauwaw nga pagamit sa Comelec, militar ug kapolisan
sa eleksiyon sa 2004 ug sa Kongreso ug ubang ahensiya sa gobyerno sa
impeachment proceedings sa niaging tuig—nga di siya managana paglubag sa
demokratikanhong mga institusyon aron lang pagtagbaw sa iyang way kinutobang
politikanhong mga ambisyon? [30] leo_lastimosa@abs-cbn.com


remote Gipada ni: nagpakabana at 6:55 PM WST
Saturday, 25 February 2006
Arangkada for February 26, 2006
*KRIMEN SA MEDIA*



Aron pagmatuod nga di siya kutob ra pagarpar ug pamostura, dako na
og agi si Presidente Arroyo pipila pa lang ka oras human niya gideklarar ang
state of national emergenCY:

? Gipabungkag na niyang rallies sa Edsa ug sa Makati ug gipadakop ang
mga demonstrador nga gipangulohan ni UP Prof. Randy David;

? Giparonda na niyang buhatan sa Philippine Tribune ni Ni?ez
Cacho-Olivarez;

? Gipadakop na niya silang Heneral Ramon Monta?o ug ubang retiradong
mga opisyal sa kapolisan ug armadong kusog nga gilambigit sa kudeta; ug

? Gipadakop na niyang mga lider sa militanteng mga grupo sama nilang
Crispin Beltran sa Anak Pawis, Satur Ocampo sa Bayan Muna ug Renato Magtubo
sa Partido ng Manggagawa.

-o0o-

Nangugat ang mga turutot sa Malakanyang nga dugay nang gitun-an sa
mga abogado sa administrasyon, gawas nga tibuok gabii nga nagtukaw si Pres.
Arroyo ug mga sakop sa gabinete pag-umol sa Proclamation No. 1017, ang
panginahanglan sa paghupot sa presidente og gahom ubos sa state of
emergency. Apan sa pikas nga bahin, nabisto nga mao pay pagpanghipos nilag
mga ebidensiya sa sukaranan sa proklamasyON: Nga nakigkonsabo ang
politikanhong oposisyon sa mga rebeldeng sundawo ug mga rebeldeng komunista
aron pagpalagpot sa administrasyon.

Si Justice Secretary Raul Gonzalez, nga klarong maoy gihimong
berdugo sa administrasyon, wa kapugong sa iyang kaugalingon pagbugalbugal sa
mga sakop sa media nga nangita sa mga ebidensiYA: "Di mo korte nga among
hatagan sa among pruyba." Kay nasuhito si Gonzalez nga tungod sa limitasyon
sa mga hukmanan malangay ang paghusay sa kamakiangayon sa deklarasyon ug
segurong maunhan na sa pagkatuman sa tuyo ug sa paglibkas ini.

-o0o-

Bisan kon giisip ang state of national emergency nga manghod lang
og dyutay sa martial law, ang mga gahom nga gipasidaan ni Pres. Arroyo nga
iyang ipahamtang batok sa mga mabudhion sa nasud iyang magamit bisan kon wa
ang deklarasyon. Gawas lang sa pagbanos sa public utilities, sama sa mga
kompaniya sa tubig, elektrisidad, transportasyon, telepono ug, panguros mong
daan, mga estasyon sa radyo ug telebisyon.

Salamat sa gawasnong media, wa masubli ang pait nga kasinatian sa
katawhan dihang gipakanaog sa diktador nga si Ferdinand Marcos ang bangis
nga balaod militar niadtong 1972: Nahikawan sila sa tukmang kasayuran,
niburot pag-ayong kahadlok maong nakapatuyang ang diktadura paglugos sa
nasudnong katigayonan ug kagawasan.

-o0o-

Apan usahay ang hudlat mas epektibong makagapos sa mga sakop sa media kay sa
aktuwal nga pagpahilom nila. Segun pang Jun Nicdao, nasudnong tsirman sa
KBP, ang labing dakong kahadlok karon sa kinabag-an sa mga magsisibya mao
nga kon duna pa ba silay trabaho ug unsay ibuhi sa ilang mga pamilya.

Karong ang kagawasan sa pagsulti nahiagom sa dakong pagsuway, ang paglingiw,
pagpakahilom ug pagtalaw maoy labing dakong krimen nga mahimo sa usa ka
sakop sa media. [30] leo_lastimosa@abs-cbn.com


remote Gipada ni: nagpakabana at 3:55 PM WST
Friday, 24 February 2006
Arangkada for February 25, 2006
*PAGHOT WAY** PAAK*

Sa iyang gipirmahan nga Proclamation No. 1017 nga nagdeklarar sa State of
National Emergency, si Presidente Arroyo nipasangil sa mga sakop sa
politikanhong oposisyon nga nakigkonsabo sa mga rebeldeng komunista ug sa
mga rebeldeng sundawo—nga iyang gideklarar nga maoy mga kaaway sa
demokratikanhong mga institusyon sa nasud—sa paglumpag sa iyang
administrasyon.

Ang seryusong pasangil sa presidente wa paluyohi og bisan unsang ebidensiya.
Labaw nang wa siyay gitanyag nga kalig-onan sa laing pasangil nga ang
alyansa sa tulo ka managlahi nga puwersa nagsublisubli na pagsuway
pagpalagpot sa presidente. Ni sa lain niyang pasangil nga ang ilang mga
pasangil gipaburot sa pipila ka mga sakop sa media.

-o0o-

Gani, ang mga sukaranan sa proklamasyon sa presidente gisukwahi sa
iyang kaugalingong mga sakOP:

? Si AFP Chief Generoso Senga nideklarar sa iyang press conference nga
way labot si kanhi presidente Joseph Estrada sa nasakpan nilang kalihokan sa
mga sundawo nga gipangulohan ni Brig. Gen. Danilo Lim;

? Si Senga mismo nipasabot nga way kudeta nga nahitabo kay igo lang
nagplano ang grupo ni Lim sa pagkuyog sa mga protesta batok sa
administrasyon;

? Si Chief of Staff Mike Defensor niangkon nga wa pa silay ebidensiya
nga may mga sakop sa media nga aktibong nitabang sa mga kaatbang ni
Presidente Arroyo; ug

? Ang pasangil sa presidente nga nagusbat ang ekonomiya tungod sa
kalihokan sa iyang mga kaatbang gipanghimakak sa iyang economic team kinsa
niinsistir nga nilambo ang stock market ug nilig-on ang peso atubangan sa
dolyar.

-o0o-

Sa samang proklamasyon, gipasanginlan sang Presidente Arroyo ang
iyang mga kaatbang nga naghimo og hiningusgang kampanya pagsabotahe sa
pagsalig sa katawhan ug paglumpag sa demokrasya. Nahadlok kong, sa iyang
kahilas ug kahakog sa gahom, giisip na sa presidente ang iyang politikanhong
kaugmaon nga kabahin sa demokratikanhong mga institusyon.

Kay ang politikanhong oposisyon, nga sama sa presidente mameligro
kon makatungtong sa gahom ang mga rebelde—ma-toohon man o ma-walhon, igo
lang nangayog katin-awan sa wa pa mahusay nga mga pasangil sa pagpanikas sa
presidente sa eleksiyon sa 2004. Nga mao say giawhag sa Simbahang Katoliko.
Gitulisok ba sab sa presidente ang mga obispo nga mga kaaway sa demokrasya?

-o0o-



Tungod sa proklamasyon, gidid-an na sa presidente ang mga protesta
sa kadalanan ug gipasidan-an ang media organizations nga mahimo silang
tak-opan ug sakmitON:

? Nabungkag tuod nilang martsa sa Edsa nga gipangulohan ni UP Prof.
Randy David, apan way nahimo sa mas dakong demonstrasyon nga gipangulohan ni
kanhi presidente Cory Aquino sa Makati; ug

? Wa magsilbing ilang panghudlat pagbugnaw sa media pag-cover sa mga
protesta ug mga diskurso batok sa kagamhanan.

Ang labing dakong insulto ngadto sa usa ka iro nga nagpaghot sa buwan mao
nga bisan ang mga iring di na mahadlok sa iyang paak. [30]
leo_lastimosa@abs-cbn.com


remote Gipada ni: nagpakabana at 5:19 PM WST
Thursday, 23 February 2006
Arangkada for February 24, 2006
*BALIBAD SA TABANG?*



Padayong nagbaha ang mga hinabang sa mga Sugbuanon sa Kapamilya
Relief Campaign sa DYAB Abante Bisaya alang sa mga biktima sa
katalagman sa Southern
Leyte. Apan nakabantay ko nga inay mohangop sa tanang gitanyag nga
hinabang, ang kadagkoan sa St. Bernard, ang lungsod nga nawad-an og
baranggay tungod sa pagtabon sa usa ka bahin sa bukid sa Kan-abag sa
Guinsaugon, nagkalingaw og pamalibad.

Dihang gipahibawo sa among plano pagda sa labing maayong mga doktor
ug mga dentista sa Sugbo alang sa medical ug dental mission sa St. Bernard
karong Sabado, ang lokal nga mga opisyal gikatahong nitubag nga wa
magkinahanglan og mga tambal ang kaliboan ka mga bakwet. Nadasonan ni sa
kasayuran nga among nadawat nga bisan ang ubang kahugpongan sa mga doktor sa
ubang bahin sa Leyte gibalibaran sab.

-o0o-

Sayon ra unta kaayo ang pagsibog sa among plano ug pagtingob na lang
sa among panahon pagpamutos sa mga hinabang nga pagkaon gikan sa mga
Sugbuanon aron mapada sa labing daling panahon ngadto sa mga biktima di lang
sa katalagman sa Guinsaugon kon dili hasta na sa mas lapad nga pagdahili sa
yuta nga nakaigo sa labing 10 ka lungsod sa Southern Leyte. Apan nakakita
ko sa tinuod nga kahimtang sa mga biktima sa hagip-ot kaayong evacuation
centers.

Gawas sa kahuot nga nisangpot na sa kagid ug peskat sa pipila ka
bakwet, ang labing dako nilang problema mao ang kakuwang sa kahimanan sa
pagluto sa hinabang nga mga pagkaon nga ilang nadawat. Pipila sa mga
biktima napugos na lang intawon pagkilaw sa bugas ug noodles kay wa silay
kaldero ni kusina nga kalung-agan. Kon naproblema sa panglawas ang mga
molupyo nga dunay ilang kaugalingong mga pinuy-anan, nganong likayan man sa
sakit ang evacuation centers nga may usa ka kuwartong gipapuy-an og 31 ka
pamilya?

-o0o-

Nasobrahan na ba gyong hinabang sa mga biktima? O nitoo lang ang
mga opisyal sa St. Bernard sa ilang propaganda nga kontrolado nilang
sitwasyon ug naatiman ang tanang panginahanglan sa mga bakwet?

Ang labing uwahing taho ni Rico Lucena sa TV Patrol Central Visayas
mao nga nangalisbo na sa kabaho ang evacuation centers. Tungod ba ni kay
way sakit? O sa mga hinabang nga nangalata kay way klarong sistema
pag-apod-apod? O hinungaw sa tinuod nga pait nga kahimtang sa mga biktima
nga gustong tagoan sa lapok sa pamakak sa ilang mga politiko?

-o0o-

Ambot madayon pa bang medical ug dental mission sa St.
Bernard. Mag-agad
ko sa management sa ABS-CBN ug sa mga doktor sama nilang Dr. Wyben Briones
ug Dr. Fidelis Quiza.

Apan kon akoy pangutan-on, ako moingON: Kon abugon mi sa evacuation
centers, mangalad mi sa gawas diin may mga molupyo nga bisan di bakwet
mahinangop inay maghilas-hilas pagbabag sa libreng konsultasyon ug mga
tambal. [30] leo_lastimosa@abs-cbn.com


remote Gipada ni: nagpakabana at 9:19 PM WST
Wednesday, 22 February 2006
Arangkada for February 23, 2005
*UNSAON PAGTABANG*



Kon gusto kang motabang sa mga biktima sa katalagman sa Southern
Leyte, niang mga kalihokan sa Kapamilya Relief Campaign sa DYAB Abante
Bisaya nga mahimo nimong apilAN:

- Pag-apil sa lapad nga paglung-ag og bugas human ug pagluto sa labing
yanong mga pagkaon alang sa kaliboan ka mga biktima sa Guinsaugon ug laing
10 ka barangay sa St. Bernard;
- Pagboluntaryo sa medical/dental mission ug mass feeding sa tibuok
adlawng Sabado sa tanang evacuation centers sa St. Bernard;
- Pagpahuwam og dagkong kaldero ug kawa nga kalutoan sa lima ka sakong
bugas alang sa pamahaw ug laing lima ka sakong bugas alang sa paniudto
ug sinakong monggos, 8,000 ka itlog ug ubang sud-an;
- Paghatag og tambal nga labing gikinahanglan sa mga bata, mga
tiguwang ug ubang mga bakwet nga nag-antos sa way hunong nga pag-uwan ug sa
grabeng kahagip-ot sa ilang nahimutangan; ug
- Pagboluntaryo pagpamutos sa nagbuntaog nga relief goods gikan sa
nagpakabanang mga Sugbuanon.



Si Presidente Arroyo, sa iyang pakig-atubang sa bag-ong nanumpa
nga mga opisyal sa Kapisanan ng mga Brodkaster ng Pilipinas (KBP) Cebu
Chapter nga gipangulohan ni Chairman Edward Abad, nipakugang sa kadaghanan
sa iyang pagdeklarar nga di siya inahan ni apohan kay natingob ang iyang
panahon sa pagduma sa nasud. Mao ni kontrobersiyal niyang tubag sa inosente
kaayong pangutana ni Bong Aznar sa RPN, bise tsirman sa KBP sa TV, kon
giunsa pagbalanse ang iyang panahon isip presidente, inahan ug apohan.

Kon tinuod pang gipalabi sa presidente ang pagduma sa nasud kay
sa pribadong mga interes sa mga sakop sa iyang pamilya, nganong naapiki mang
kahimtang sa nasud? Kon tinuod pang hingpit nga gitalikdan ang iyang mga
obligasyon ngadto sa iyang pamilya, nganong gipasagdan mang iyang bana ug
anak pagladlad sa ilang kaduol sa luwag aron pagpalusot sa labing dagkong
mga transaksiyon sa iyang administrasyon?

-o0o-

Gipasidunggan ang DYAB Abante Bisaya isip usa sa most
outstanding private institutions atol sa pagsaulog sa ika-69 nga charter day
sa dakbayan sa Sugbo. Bisan nahimutang sa Mandaue, giila sa kadagkoan sa
Sugbo ang nagkalainlaing kalihokan sa DYAB—sama sa higanteng Halad sa
Kapamilya sa Plaza Independencia niadtong Nobyembre, job fairs,
medical/dental missions, tree planting, bloodletting ug livelihood skills
trainings—nga napahimuslan sab sa mga molupyo sa dakbayan.

Ang tinuod nga tag-iya ning maong pasidungog mao ang mga
tigpaminaw sa DYAB. Kon di pa tungod sa ilang hinabang ug pagpaluyo,
gilangaw unta ug mingaw pa sa tirana ang gipasiugdahan namong mga kampanya.
Sa makausa pa, akong klaruhon dinhi nga ang DYAB igo lang nahimong taytayan
tali sa way kinutobang mga panginahanglan sa kinabag-an sa katawhan ug sa
mga ahensiya sa gobyerno ug pribadong mga institusyon nga naa sa posisyon
pag-alagad nila. [30] leo_lastimosa@abs-cbn.com


remote Gipada ni: nagpakabana at 4:55 PM WST
Tuesday, 21 February 2006
Arangkada for February 22, 2006
*TUKMANG PAGKAON*

Kon naglibog pa mo unsay ihatag nga hinabang alang sa mga biktima sa
pagdahili ug pagkapatag sa bukid sa Kan-abag nga nitabon sa Barangay
Guinsaugon sa Saint Bernard, Southern Leyte, di kong kabasol ninyo. Kay lahi
kaayong atong gihunahuna nga panginahanglan sa mga biktima gikan dinhi sa
Sugbo kon itandi sa tinuod nilang panginahanglan nga imo lang makita kon
moduaw ka sa naghuot nilang evacuation centers. Sa tibuok adlaw nakong
pakig-uban sa mga biktima sa kinapusoran sa Saint Bernard, nahugno ko
pagkahibawo nga di kapahimuslan sa mga biktima ang kasagaran sa relief goods
gikan sa Sugbo ug ubang bahin sa nasud kAY:

-

Wa silay kaldero nga kalung-agan sa hilaw nga bugas ni kaserola nga
kalutoan sa noodles;
-

Way kusina ang evacuation centers nga naghuot nang daan sa mga bakwet,
ang usa gani ka classroom maoy gipapuy-an sa, panggunit sa imong
lingkoranan, 31 ka pamilya; ug
-

Bisan may kaldero ug kusina pa, di lang gihapon kaluto kay way sugnod
ug kon duna man basa ug di maduktan.

-o0o-

Si Jules Penales sa ABS-CBN Foundation, nga maoy nakahatag sa labing lapad
ug sustinidong tabang sa mga bakwet, niingon nga nagluya ang kasagaran sa
mga biktima kay pulos hilaw nga sardinas ug parat nga noodles ray ilang
gikaon sa niaging mga adlaw. Maong giawhag niyang kadagkoan sa Southern
Leyte nga usbon ang putahe aron kalikayan ang mas dakong sulirAN:
Malnutrisyon.

Sa mga gusto pang mohatag og hinabang sa nagbangotan ug gipanggutom nga mga
bakwet, niang sugyot ni PenalES:

-

Pagkaon nga sayon ra o di na kinahanglang lutuon;
-

Linuto nga pagkaon nga di mapan-os sud sa duha o tulo ka adlaw
paghatag og lugway sa posibleng kalangay sa pagbiyahe gikan sa Sugbo paingon
sa Southern Leyte; ug
-

Mga pagkaon nga may bitamina ug nutrisyon nga makapalig-on sa
panglawas sa mga bakwet aron makasugakod di lang batok sa mga kagaw ug sakit
kon dili sa bug-at nga palas-unon sa pagkamatay sa ilang mga kapamilya nga
natabonan sa pagdahili sa yuta.

-o0o-

Sa nagpadayong Kapamilya Relief Campaign sa DYAB Abante Bisaya ug ABS-CBN
Cebu, nangayo na mig tambag sa mga tigpaminaw unsa ang mga pagkaon nga
mahatod sa mga biktima nga makapasar sa mga lagda sa ABS-CBN Foundation.
Nag-una sa ilang mga sugyot mao ang itlog nga linung-ag, linat-ang munggos,
inun-onan ug piniritong isda, adobong baboy, kasahos, puso, piniritong
kan-on, biscuit, pan, tinabal ug buwad.

Gidasig ang nutritionists ug mga eksperto sa pagkaon sa pagtudlo namo sa
labing sayon andamon, labing makatabang sa panglawas ug labing barato nga
pagkaon nga mahatod ngadto sa kaliboan ka mga biktima sa Southern Leyte.
[30] leo_lastimosa@abs-cbn.com


remote Gipada ni: nagpakabana at 7:28 PM WST
Monday, 20 February 2006
Arangkada for February 21, 2006
* MADRENG KUSINERA*


Saint Bernard, Southern Leyte – Si Sr. Jackie Clemencio, Franciscan,
nagpasiugda og medical mission alang sa kabos nga mga molupyo sa Baybay,
Leyte, diin siya magbase, uban sa mga doktor sa Chong Hua Hospital sa Sugbo,
dihang nakadawat sa makapakugang nga kasayuran sa pagdahili sa usa ka bahin
bukid sa Kan-abag nga nitabon sa tibuok Barangay Guinsaugon ug nilubong sa
tanang mga molupyo. Tungod sa iyang lapad nga kasinatian pag-atiman sa mga
biktima sa dagkong katalagman, apil nang mga naigo sa higanteng baha sa
Ormoc City sa Leyte nga nipatay og kapin sa 6,000 niadtong Nobyembre 1991,
gisugo si Sr. Jackie sa iyang kadagkoan pag-adto sa labing daling panahon sa
St. Bernard.

Kusog ang bunok sa uwan dihang akong gikaila si Sr. Jackie sa Cristo Rey
Regional High School nga giduma sa Franciscan Sisters, nga mao karoy
nahimong labing dakong evacuation center sa mga biktima sa katalagman, kay
silay nag-atiman sa 195 ka pamilya o 566 ka indibiduwal sa Guinsaugon nga,
naluwas man tuod, apan nawad-an sa hapit tanang mga sakop sa ilang pamilya.
Ang himsog nga bayhon ug kalantip sa sinultihan sa madre nakapakumbinser
nako nga naa sa maayong mga kamot ang mga bakwet.

-o0o-

Gawas sa pag-atiman sa way kinutobang panginahanglan sa mga bakwet, si Sr.
Jackie mao say tig-andam sa pagkaon sa gatosan ka mga sundawo sa Pilipinas,
Estados Unidos, Taiwan ug Malaysia nga maoy nagduma sa kinatibuk-ang search,
rescue ug retrieval operation sa napatag nga Guinsaugon. Wa niya pakyasa ang
iyang mga kustomer.

Ang padayong kabaskog sa rescue workers bisan human sa upat ka adlaw sa
budlay nga pagkubkob sa mabudhiong huyunghuyong, nga nisangpot gani sa
pagsaulog dayong tikyop sa kangitngit gabii tungod sa kasayuran nga naluwas
ang labing menos 50 ka tinun-an sa Guinsaugon Elementary School, masubay sa
kusina ni Sr. Jackie.

-o0o-

15 ka sakong bugas humay ang lung-agon ni Sr. Jackie kada adlaw, taglima sa
pamahaw, paniudto ug panihapon. Napugos siya pagpanghuwam sa labing dagkong
kaldero ug kawa sa lungsod. Maabtan silag kapin sa tulo ka oras una
makaluto.

Bisan sa kakugi ug katakos ni Sr. Jackie, dunay mga higayon nga nauwahi
sila. Usa ka tingkaonan, gida na lang nilang mga kaldero ug mga kawa kay wa
nay panahon pagbahin sa pagkaon. Hangtod karon, sama sa kinabag-an sa mga
biktima sa pagdahili sa yuta, wa pa igkita ang mga kaldero ug mga kaha nga
gikuninitan sa mga sundawo.

Apan kahibawo si Sr. Jackie unsaon pagkuha ang iyang gusto. Dihang nireklamo
sa kahugaw sa command post, nahasiril-siril ang mga heneral pagpangitag mga
baril sa basura. Tungod sa pakapin nga hudlat sa madre nga mohunong na siya
pagluto kon di manlimpiyo ang kasundalohan. [30] leo_lastimosa@abs-cbn.com


remote Gipada ni: nagpakabana at 8:18 PM WST

Newer | Latest | Older

« November 2017 »
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30
You are not logged in. Log in
Entries by Topic
All topics  «
Likay sa Lalis